ജോഷിമഠിന്റെ വലിയൊരു ഭാഗം ഇടിഞ്ഞുതാഴും: മുന്നറിയിപ്പുമായി ഐഎസ്ആര്‍ഒ
ന്യൂഡൽഹി: ജോഷിമഠിന്റെ വലിയൊരു ഭാഗം പൂർണമായും ഇടിഞ്ഞ് താഴുമെന്ന മുന്നറിയിപ്പ് നൽകി ഐഎസ്ആർഒ. ഭൂമി ഇടിഞ്ഞ് താഴുന്നതിൻ്റെ വേഗത വർദ്ധിക്കുകയാണ്. 2022 ഡിസംബർ 27 മുതൽ ഈ വർഷം ജനുവരി 8 വരെയുള്ള 12 ദിവസത്തിനുള്ളിൽ 5.4 സെന്‍റിമീറ്റർ ഇടിഞ്ഞ് താഴ്ന്നു. കഴിഞ്ഞ ഏപ്രിൽ മുതൽ നവംബർ വരെ ആകെ 8.9 സെന്‍റിമീറ്റർ മാത്രം ഇടിഞ്ഞ് താഴ്ന്ന അവസ്ഥയിൽ നിന്നാണ് ഈ അടുത്ത ദിവസങ്ങളിൽ ഭൂമി താഴ്ന്നതിൻ്റെ വേഗത കൂടിയത്. ഐഎസ്ആർഒയുടെ നാഷണൽ റിമോട്ട് സെൻസിംഗ് സെന്‍റർ ജോഷിമഠിന്റെ ഉപഗ്രഹ ചിത്രങ്ങൾ വിലയിരുത്തി പ്രാഥമിക റിപ്പോർട്ട് സമർപ്പിച്ചു. ഐഎസ്ആർഒയുടെ കാർട്ടോസാറ്റ്-2എസ് ഉപഗ്രഹമാണ് ചിത്രങ്ങൾ പകർത്തിയത്. സൈന്യത്തിന്‍റെ ഹെലിപാഡും നരസിംഹ ക്ഷേത്രവും ഉൾപ്പെടെ ജോഷിമഠിന്റെ നഗരഭാഗം മുഴുവൻ താഴുകയാണെന്ന് ഉപഗ്രഹ ചിത്രങ്ങൾ കാണിക്കുന്നു. ജോഷിമഠ്-ഓലി റോഡും തകരും. വീടുകളിലും റോഡുകളിലും രൂപപ്പെട്ട വിള്ളലുകൾ ശാസ്ത്രീയ സംഘം വിശദമായി പരിശോധിച്ച് വരികയാണ്. വിശദമായ റിപ്പോർട്ട് ഉടൻ സമർപ്പിക്കും.
