നടന് കൊച്ചു പ്രേമന് അന്തരിച്ചു
തിരുവനന്തപുരം: നടന് കൊച്ചു പ്രേമന് അന്തരിച്ചു. ശ്വാസകോശ സംബന്ധമായ രോഗത്തെ തുടര്ന്ന് ചികിത്സയില് ആയിരുന്നു. തിരുവനന്തപുരം ജില്ലയിലെ വിളപ്പില് പഞ്ചായത്തില് പേയാട് എന്ന ഗ്രാമത്തില് ശിവരാമ ശാസ്ത്രികളുടേയും കമലത്തിന്റെയും മകനായി 1955 ജൂണ് ഒന്നിനാണ് കൊച്ചു പ്രേമന്റെ ജനനം. പ്രാഥമിക വിദ്യാഭ്യാസം പേയാട് ഗവ.സ്കൂളില് പൂര്ത്തിയാക്കിയ കൊച്ചു പ്രേമന് തിരുവനന്തപുരം എം.ജി. കോളേജില് നിന്ന് ബിരുദം നേടി. കെ.എസ്.പ്രേംകുമാര് എന്നതാണ് ശരിയായ പേര്. എട്ടാം ക്ലാസില് പഠിക്കുമ്പോഴാണ് ആദ്യമായൊരു നാടകമെഴുതി സംവിധാനം ചെയ്യുന്നത്. അത് വിജയകരമായതിനെ തുടര്ന്ന് ഉഷ്ണരാശി എന്ന രണ്ടാമത്തെ നാടകവും രചിച്ചു. ആകാശവാണിയിലെ ഇതളുകള് എന്ന പരിപാടിയിലൂടെയാണ് നാടകങ്ങള് സംപ്രേക്ഷണം ചെയ്തത്. സ്കൂള് പഠനത്തിനു ശേഷം നാടകത്തെ ഗൗരവമായി കാണാന് തുടങ്ങിയത് തിരുവനന്തപുരം കവിത സ്റ്റേജിനു വേണ്ടി ജഗതി എന്.കെ.ആചാരി ഒരുക്കിയ ജ്വാലാമുഖി എന്ന നാടകത്തില് അഭിനയിച്ചതോടെയാണ്. ഇതിനു ശേഷം ഗായത്രി തീയേറ്റേഴ്സിന്റെ അനാമിക എന്ന നാടകത്തിലും തുടര്ന്നഭിനയിച്ചു. പിന്നീട് സംഘചേതന, കാളിദാസ കലാകേന്ദ്രം തുടങ്ങി പത്തോളം നാടക സമിതികള്ക്ക് വേണ്ടിയും പ്രവര്ത്തിച്ചു.ധാരാളം ആരാധകരെ സൃഷ്ടിച്ച കൊച്ചുപ്രേമന്റെ പ്രശസ്തമായ നാടകങ്ങളാണ് കേരള തീയേറ്റേഴ്സിന്റെ അമൃതം ഗമയാ, വെഞ്ഞാറമൂട് സംഘചേതനയുടെ സ്വാതി തിരുനാള്, ഇന്ദുലേഖ, രാജന്.പി.ദേവിന്റെ ആദിത്യമംഗലം ആര്യവൈദ്യശാല എന്നിവ. കൊച്ചു പ്രേമന് എഴുതി സംവിധാനം ചെയ്ത നാടകം കണ്ട പ്രശസ്ത സംവിധായകന് ജെ.സി.കുറ്റിക്കാടാണ് നാടകത്തില് നിന്ന് സിനിമയിലേക്ക് അവസരം നല്കിയത്. നാടകത്തിലൂടെ അഭിനയ രംഗത്തെത്തിയ കൊച്ചു പ്രേമന്റെ ആദ്യത്തെ സിനിമ ‘ഏഴു നിറങ്ങള്’ ആണ്. മലയാള സിനിമയിലിതു വരെ 250 ചിത്രങ്ങളില് വേഷമിട്ട കൊച്ചുപ്രേമന് സിനിമ കൂടാതെ ടെലി-സീരിയലുകളിലും സജീവമായിരുന്നു.