സെൻ്റ് തെരേസാസിൽ ആർട്സ് ക്ലബ് ഉദ്ഘാടനത്തിന് എത്തിയ നടൻ ദിലീപ്; ഓർമച്ചിത്രം പങ്കുവെച്ച് ദിവ്യ ഉണ്ണി

പഠനകാലത്തെ ത്രോ ബാക്ക് ചിത്രം പങ്കുവെച്ച് നടി ദിവ്യ ഉണ്ണി. എറണാകുളം സെൻ്റ് തെരേസാസ് കോളെജിൽ ബിരുദ വിദ്യാർഥിനി ആയിരുന്ന കാലത്തെ ചിത്രമാണ് നടി സോഷ്യൽ മീഡിയയിലൂടെ പങ്കുവെച്ചത്.

കോളെജിൽ ആർട്സ് ക്ലബ് ഉദ്ഘാടനം ചെയ്യാൻ എത്തിയ നടൻ ദിലീപിന് ഒപ്പമുള്ള ചിത്രമാണ് താരം ഷെയർ ചെയ്തത്. കോളെജ് പ്രിൻസിപ്പാൾ ഉൾപ്പെടെയുള്ളവരെ ചിത്രത്തിൽ കാണാം. അന്നത്തെ പ്രോഗ്രാമിൽ സ്വാഗത പ്രസംഗം നടത്തിയത് താനാണെന്ന് ഒപ്പമുള്ള കുറിപ്പിൽ താരം പറയുന്നു.

കൊച്ചിക്കാരായ ഉണ്ണികൃഷ്ണൻ, ഉമാദേവി ദമ്പതികളുടെ മകളായ ദിവ്യ ഉണ്ണി ഒരു കാലത്ത് മലയാള സിനിമയിൽ നിറഞ്ഞുനിന്ന അഭിനേത്രിയാണ്. 1987-ൽ പുറത്തിറങ്ങിയ 'നീയെത്ര ധന്യ' എന്ന ചിത്രത്തിൽ ബാലതാരമായാണ് അരങ്ങേറ്റം. 'പൂക്കാലം വരവായി', 'ഓ ഫാബി' എന്നീ ചിത്രങ്ങളിലും ബാലതാരമായി വേഷമിട്ടു. 14-ാം വയസ്സിൽ ദിലീപിനൊപ്പം 'കല്യാണ സൗഗന്ധികം' എന്ന ചിത്രത്തിലൂടെയാണ് നായികയായി അരങ്ങേറുന്നത്. മമ്മൂട്ടി, മോഹൻലാൽ, സുരേഷ് ഗോപി, ജയറാം തുടങ്ങി പ്രമുഖ താരങ്ങൾക്കൊപ്പം അഭിനയിച്ചിട്ടുണ്ട്.

ഗിരി നഗറിലെ ഭവൻസ് വിദ്യാമന്ദിറിലും സെൻ്റ് തെരേസാസിലുമായി പഠനം പൂർത്തിയാക്കിയ താരത്തിന് കമ്മ്യൂണിക്കേറ്റീവ് ഇംഗ്ലിഷിൽ ബിരുദമുണ്ട്. ഭരതനാട്യം, കുച്ചിപ്പുടി, മോഹിനിയാട്ടം ഉൾപ്പെടെയുള്ള നൃത്ത രൂപങ്ങളിലെല്ലാം ശാസ്ത്രീയ പരിശീലനം നേടിയിട്ടുള്ള ദിവ്യ വിവാഹശേഷം അഭിനയ രംഗത്തോട് വിട പറഞ്ഞെങ്കിലും ഡാൻസ് സ്കൂൾ നടത്തുന്നുണ്ട്. ചലച്ചിത്ര താരങ്ങളായ രമ്യ നമ്പീശനും മീര നന്ദനും ദിവ്യയുടെ കസിൻസാണ്. മലയാളം, തമിഴ്, തെലുഗ്, കന്നട ഭാഷകളിലായി അമ്പതിലേറെ സിനിമകളിൽ ദിവ്യ അഭിനയിച്ചിട്ടുണ്ട്.