ഇന്ദു ജെയിൻ അന്തരിച്ചു.

ന്യൂഡൽഹി:

മനുഷ്യസ്നേഹി, കലാസ്വാദക, വനിതാവകാശ പ്രവർത്തക എന്നീ നിലകളിൽ ശ്രദ്ധേയ ആയിരുന്ന ടൈംസ് ഗ്രൂപ്പ് ചെയർപേഴ്സൺ ഇന്ദു ജെയിൻ അന്തരിച്ചു. 84 വയസ്സായിരുന്നു. കൊവിഡ് ബാധയെ തുടർന്ന് വ്യാഴാഴ്ച രാത്രി 9.35-ഓടെ ഡൽഹിയിൽ വെച്ചായിരുന്നു അന്ത്യം.

ഫൈസാബാദിൽ 1936 സെപ്റ്റംബർ എട്ടിനാണ് ഇന്ദുവിന്റെ ജനനം. 1999 ൽ ആണ് ടൈംസ് ഗ്രൂപ്പ് ചെയർപേഴ്സൺ സ്ഥാനത്ത് എത്തുന്നത്. 2016 ൽ രാജ്യം ഇന്ദുവിന് പദ്മഭൂഷൻ നൽകി ആദരിച്ചിരുന്നു. ഫിക്കിയുടെ വനിതാ വിഭാഗമായ എഫ് എൽ ഒയുടെ സ്ഥാപക പ്രസിഡന്റ്, ഭാരതീയ ജ്ഞാനപീഠ് ട്രസ്റ്റ് ചെയർപേഴ്സൺ തുടങ്ങിയ പദവികൾ വഹിച്ചിട്ടുണ്ട്. 2000 ൽ സന്നദ്ധ സംഘടനയായ ടൈംസ് ഫൗണ്ടേഷന് ഇന്ദു രൂപം നൽകി. ചുഴലിക്കാറ്റ്, ഭൂകമ്പം, പ്രളയം തുടങ്ങിയ ദുരന്തസമയങ്ങളിൽ സഹായധനം നൽകുന്ന ടൈംസ് റിലീഫ് ഫണ്ട് ഈ ഫൗണ്ടേഷനാണ് നൽകുന്നത്. സമഗ്രസംഭാവനകൾ പരിഗണിച്ച് 2019 ൽ ഇൻസ്റ്റിറ്റ്യൂട്ട് ഓഫ് കമ്പനി സെക്രട്ടറീസ് ഓഫ് ഇന്ത്യ ലൈഫ് ടൈം അച്ചീവ്മെന്റ് പുരസ്കാരത്തിനും ഇന്ദു അർഹയായിരുന്നു.