'സ്വേച്ഛാധിപതികൾ വർധിക്കുന്നു, മാധ്യമ പ്രവർത്തനം വെല്ലുവിളി നേരിടുന്നു'; വി.ഡി സതീശൻ

സ്വേച്ഛാധിപതികളായ ഭരണാധികാരികൾ വർധിക്കുകയാണെന്നും മാധ്യമപ്രവർത്തനം വെല്ലുവിളിയാകുന്ന കാലഘട്ടത്തിലൂടെയാണ് നാം കടന്നുപോകുന്നതെന്നും പ്രതിപക്ഷ നേതാവ് വി.ഡി സതീശൻ പറഞ്ഞു. ഏറ്റവും ഭീഷണി നേരിടുന്നത് മാധ്യമ സ്വാതന്ത്ര്യമാണ്. കള്ളക്കേസുകൾ ഫയൽ ചെയ്ത് ആക്ടിവിസ്റ്റുകളെ കുടുക്കാൻ ശ്രമിച്ചാൽ ശക്തമായി നേരിടുമെന്നും അദ്ദേഹം പറഞ്ഞു. ഭരണകൂടത്തെ എതിർക്കുന്നവരെ ദേശവിരുദ്ധരായി മുദ്രകുത്തുകയാണ് പുതിയ തന്ത്രം. കേരളത്തിലെ സർക്കാരും ഭയം സൃഷ്ടിക്കുന്നുണ്ട്. ചോദ്യങ്ങൾക്ക് ഉത്തരം പറയാതെ ഒളിച്ചോടുക എന്ന തന്ത്രമാണ് കേരളത്തിൽ സ്വീകരിക്കുന്നത്. മുഖ്യമന്ത്രി പിണറായി വിജയനോട് ചോദ്യം ചോദിക്കാൻ അവസരമില്ല. പറയുന്നത് കേട്ടു കൊണ്ട് ഇരിക്കാൻ മാത്രമേ കഴിയൂ. മുഖ്യമന്ത്രിയുടെ വാർത്താസമ്മേളനങ്ങളിൽ സ്റ്റേജ് മാനേജ്മെന്‍റ്, രാത്രി 7 മണിക്ക് പത്രസമ്മേളനം നിർത്തിയില്ലെങ്കിൽ ആകാശം ഇടിഞ്ഞുവീഴുമെന്നാണ് പറയുന്നത്. ഇത്തരം ഉപദേശങ്ങൾ നൽകുന്നവർക്ക് നല്ല നമസ്കാരമാണ് പറയാനുള്ളതെന്നും അദ്ദേഹം പരിഹസിച്ചു.