ദുൽഖറിൻ്റെ പുതിയ ചിത്രം 'ഹേ സിനാമിക'; ഫസ്റ്റ് ലുക്ക് പുറത്തിറങ്ങി

ദുൽഖർ സൽമാൻ നായകനാവുന്ന പുതിയ ചിത്രമാണ് ഹേ സിനാമിക. ചിത്രത്തിൻ്റെ ഫസ്റ്റ് ലുക്ക് അൽപ സമയം മുമ്പ് പുറത്തിറങ്ങി. ദക്ഷിണേന്ത്യൻ സിനിമകളിലെ പ്രമുഖ നൃത്ത സംവിധായികയായ ബൃന്ദ മാസ്റ്ററാണ് ചിത്രം സംവിധാനം ചെയ്യുന്നത്. കാജൽ അഗർവാൾ, അദിതി റാവു ഹൈദരി എന്നിവരും മുഖ്യവേഷത്തിലെത്തുന്ന ചിത്രം ഒരു പ്രണയ കഥയാണ് പറയുന്നത്. തമിഴിലും മലയാളത്തിലും ചിത്രം ഒരേസമയം പുറത്തിറങ്ങും.

മണിരത്നം സംവിധാനം ചെയ്ത ഒ കെ കൺമണി എന്ന ചിത്രത്തിലെ ഒരു ഗാനത്തിൽ നിന്നാണ് ഹേ സിനാമിക എന്ന പേര് രൂപപ്പെട്ടത്. ദുൽഖർ സൽമാനും നിത്യ മേനോനുമാണ് ഒ കെ കൺമണിയിൽ മുഖ്യ വേഷങ്ങൾ അവതരിപ്പിച്ചത്. സൂഫിയും സുജാതയും എന്ന ചിത്രത്തിലൂടെ അദിതി റാവു മലയാളത്തിന് സുപരിചിതയാണ്.

മദൻ കാർക്കിയാണ് ചിത്രത്തിൻ്റെ രചന നിർവഹിച്ചിരിക്കുന്നത്. സംഗീതം ഗോവിന്ദ് വസന്ത. ഛായാഗ്രഹണം പ്രീത ജയരാമൻ. എഡിറ്റിങ്ങ് രാധ ശ്രീധർ. 2022 ഫെബ്രുവരി 25-ന് ചിത്രം തിയേറ്ററുകളിൽ റിലീസ് ചെയ്യും. കണ്ണും കണ്ണും കൊള്ളയടിത്താൽ ആണ് ദുൽഖറിൻ്റേതായി ഒടുവിൽ പുറത്തിറങ്ങിയ തമിഴ് ചിത്രം.