തുടർ പഠനം; ഉക്രെയ്നിൽ നിന്ന് ഒഴിപ്പിച്ച ഇന്ത്യൻ വിദ്യാർത്ഥികളുടെ ഹർജി ഇന്ന് സുപ്രിംകോടതി പരിഗണിക്കും

ന്യൂഡൽഹി: ഉക്രെയ്നിൽ നിന്ന് ഒഴിപ്പിച്ച ഇന്ത്യൻ വിദ്യാർത്ഥികൾക്ക് മെഡിക്കൽ പഠനം തുടരാൻ അനുമതി തേടിയുള്ള ഹർജി സുപ്രിം കോടതി ഇന്ന് വീണ്ടും പരിഗണിക്കും. കേസിൽ വിശദമായ സത്യവാങ്മൂലം സമർപ്പിക്കാൻ സുപ്രിം കോടതി നേരത്തെ കേന്ദ്ര സർക്കാരിന് നിർദേശം നൽകിയിരുന്നു. റഷ്യ-ഉക്രെയിൻ യുദ്ധത്തിന്‍റെ പ്രതിസന്ധി കുട്ടികളുടെ വിദ്യാഭ്യാസത്തെ ഗുരുതരമായി തടസ്സപ്പെടുത്തി. ഉക്രെയ്നിലെ നിർഭാഗ്യകരമായ സംഭവങ്ങൾ അവിടെ നിന്ന് വിദ്യാർത്ഥികളെ ഒഴിപ്പിക്കുന്നതിലേക്ക് നയിച്ചു. തൽഫലമായി, അവരുടെ വിദ്യാഭ്യാസം പ്രതിസന്ധിയിലായി. കുട്ടികളുടെ വിദ്യാഭ്യാസം അപകടത്തിലാണെന്നും ഹർജിയിൽ ആരോപിക്കുന്നു. 2022 ഫെബ്രുവരി മുതൽ വിദ്യാർത്ഥികളുടെ പഠനം പൂർണമായും നിശ്ചലമായി. യുദ്ധത്തിൽ തകർന്ന രാജ്യത്ത് ഇതുവരെ സമാധാനം പുനഃസ്ഥാപിച്ചിട്ടില്ലെന്നും ഹർജിയിൽ പറയുന്നു. ജസ്റ്റിസ് ഹേമന്ത് ഗുപ്ത അദ്ധ്യക്ഷനായ ബെഞ്ചാണ് കേസ് പരിഗണിക്കുക.