ചാൻസലർ പദവി മാറ്റിയത് സർക്കാരിന്റെ സ്വാതന്ത്ര്യമെന്ന് ഗവർണർ
ന്യൂഡൽഹി: കലാമണ്ഡലം കൽപിത സർവകലാശാലയുടെ ചാൻസലർ സ്ഥാനത്ത് നിന്ന് മാറ്റിയത് സംസ്ഥാന സർക്കാരിന്റെ സ്വാതന്ത്ര്യമാണെന്നും അത് നിയമപരമാണോ അല്ലയോ എന്ന കാര്യത്തിൽ പ്രതികരിക്കാനില്ലെന്നും ഗവർണർ ആരിഫ് മുഹമ്മദ് ഖാൻ പറഞ്ഞു. മാധ്യമങ്ങളിലൂടെയാണ് തന്നെ മാറ്റിയതിനെ കുറിച്ച് അറിഞ്ഞതെന്നും അദ്ദേഹം പറഞ്ഞു. സംസ്ഥാനത്തെ 14 സർവകലാശാലകളുടെയും ചാൻസലർ സ്ഥാനത്ത് നിന്ന് ഗവർണറെ നീക്കാൻ ഓർഡിനൻസ് കൊണ്ടുവരാൻ ബുധനാഴ്ച ചേർന്ന മന്ത്രിസഭായോഗം തീരുമാനിച്ചിരുന്നു. ഇതിന് പിന്നാലെയാണ് കലാമണ്ഡലം ചാൻസലർ സ്ഥാനത്ത് നിന്ന് ഗവർണറെ നീക്കി സാംസ്കാരിക വകുപ്പ് ഉത്തരവിറക്കിയത്. ചാൻസലറുടെ അഭാവത്തിൽ പ്രോ ചാൻസലറായ സാംസ്കാരിക മന്ത്രി വി എൻ വാസവനായിരിക്കും ചുമതല.
