കെടിയു സിന്‍ഡിക്കേറ്റ് തീരുമാനങ്ങള്‍ സസ്പെന്‍ഡ് ചെയ്ത ഗവർണറുടെ നടപടി റദ്ദാക്കി ഹൈക്കോടതി
കൊച്ചി: സാങ്കേതിക സർവകലാശാല സിൻഡിക്കേറ്റിന്‍റെ തീരുമാനങ്ങൾ റദ്ദാക്കിയ ഗവർണർക്ക് തിരിച്ചടി. ഗവർണറുടെ നടപടി ഹൈക്കോടതി റദ്ദാക്കി. സിൻഡിക്കേറ്റിന് വേണ്ടി ഐ ബി സതീഷ് എം.എൽ.എ നൽകിയ ഹർജി ജസ്റ്റിസ് സതീഷ് നൈനാൻ അനുവദിച്ചു. സർവകലാശാലയുടെ ദൈനംദിന പ്രവർത്തനങ്ങളുടെ മേൽനോട്ടം വഹിക്കാനുള്ള ഉപസമിതി റദ്ദാക്കിയതടക്കമുള്ള നടപടികളെ ചോദ്യം ചെയ്തായിരുന്നു ഹർജി. ഇടക്കാല വി.സിയുടെ കത്തിന്‍റെ അടിസ്ഥാനത്തിലാണ് സിൻഡിക്കേറ്റിന്‍റെയും ബോർഡ് ഓഫ് ഗവർണേഴ്സിന്‍റെയും തീരുമാനങ്ങൾ ഗവർണർ റദ്ദാക്കിയത്. ഗവർണറുടെ ഉത്തരവ് നിയമപരമല്ലെന്നും തീരുമാനമെടുത്ത സമിതികളുടെ വാദം കേൾക്കാതെയുള്ള നടപടി സർവകലാശാല നിയമത്തിന് വിരുദ്ധമാണെന്നും ഹർജിയിൽ ചൂണ്ടിക്കാട്ടിയിരുന്നു.
