വിജയ് സേതുപതിയെ ചവിട്ടുന്നവർക്ക് ഓരോ ചവിട്ടിനും 1001 രൂപ സമ്മാനം പ്രഖ്യാപിച്ച് ഹിന്ദു മക്കൾ കക്ഷി

ചെന്നൈ: നടൻ വിജയ് സേതുപതിയെ ചവിട്ടുന്നവർക്ക് ഓരോ ചവിട്ടിനും 1001 രൂപ പാരിതോഷികം നൽകുമെന്ന് ഹിന്ദു മക്കൾ കക്ഷി. ഹിന്ദു മക്കൾ കക്ഷിയുടെ ഔദ്യോഗിക ട്വിറ്റർ അക്കൗണ്ടിലൂടെ കക്ഷി നേതാവ് അർജുൻ സമ്പത്താണ് പ്രഖ്യാപനം നടത്തിയിരിക്കുന്നത്. സ്വാതന്ത്ര്യ സമര സേനാനി ദൈവ തിരു പശുപൺ മുത്തുരാമലിംഗ തേവരെ നടൻ അപമാനിച്ചു എന്നാരോപിച്ചാണ് ആക്രമണത്തിന് ആഹ്വാനം ചെയ്തത്. തേവരുടെ ജന്മദിന ആഘോഷത്തിനു ക്ഷണിച്ചിട്ടു വന്നില്ല എന്നും നടനെതിരെ സംഘടന ആരോപണം ഉന്നയിക്കുന്നുണ്ട്.

ബംഗളൂരു വിമാനത്താവളത്തിലെ സംഭവത്തിന് മുൻപ് വിമാനത്തിൽ വെച്ച് വിജയ് സേതുപതി തേവർ സമുദായത്തെയും തേവർ സമുദായ നേതാവായ മുത്തുരാമലിംഗ തേവരെയും അപമാനിച്ച് സംസാരിച്ചെന്നാണ് അർജുൻ സമ്പത്ത് പറയുന്നത്. കഴിഞ്ഞ ദിവസം ബംഗളൂരു വിമാനത്താവളത്തിൽ വിജയ് സേതുപതിയെ ആക്രമിക്കാനുള്ള ശ്രമം നടന്നിരുന്നു. നടന്റെ സഹായിക്ക് ചവിട്ടേൽക്കുകയും ചെയ്തു. എന്നാൽ അത് വിജയ് സേതുപതിയുമായി ബന്ധപ്പെട്ട പ്രശ്‌നമല്ല, സുഹൃത്തുമായി ബന്ധപ്പെട്ട പ്രശ്‌നമാണെന്നായിരുന്നു അന്ന് പുറത്തുവന്ന വിവരം.