സംസ്ഥാനത്ത് കൊവിഡ് കേസുകളിൽ വ‍ർധന; ജാഗ്രതാ നിർദേശം പുറപ്പെടുവിച്ചു
തിരുവനന്തപുരം: കഴിഞ്ഞ കുറച്ച് ദിവസങ്ങളായി കൊവിഡ് കേസുകൾ വർദ്ധിക്കുന്ന സാഹചര്യത്തിൽ സംസ്ഥാനത്ത് കൊവിഡ് ജാഗ്രതാ നിർദേശം പുറപ്പെടുവിച്ചു. പ്രതിദിന കൊവിഡ് കേസുകളിൽ നേരിയ വർധനവുണ്ടായ സാഹചര്യത്തിലാണ് ജാഗ്രതാ നിർദേശം. കൊവിഡ് സർജ് പ്ലാൻ തയ്യാറാക്കാൻ ആശുപത്രികൾക്ക് നിർദേശം നൽകിയിട്ടുണ്ട്. കേസുകൾ വർധിക്കുന്ന സാഹചര്യത്തിൽ തയ്യാറെടുപ്പുകൾ നടത്താൻ ജില്ലകൾക്കും നിർദേശം നൽകിയിട്ടുണ്ട്. കേസുകൾ വർദ്ധിച്ചാൽ ആശുപത്രികളിൽ ഐസിയു, വെന്‍റിലേറ്റർ സൗകര്യങ്ങൾ ഉപയോഗിക്കാൻ സജ്ജമാക്കണമെന്നും നിർദ്ദേശമുണ്ട്. സംസ്ഥാനത്ത് പ്രതിദിന കൊവിഡ് കേസുകളുടെ എണ്ണം ഇന്നലെ 172 ആയി ഉയർന്നിരുന്നു. ഈ സാഹചര്യത്തിലാണ് നിരീക്ഷണം ശക്തമാക്കിയത്. ജിനോമിക് പരിശോധനയും ശക്തിപ്പെടുത്തും. അതേസമയം നിലവിൽ സംസ്ഥാനത്ത് ഒരിടത്തും കൊവിഡ് ക്ലസ്റ്റർ ഇല്ല.
