കേരള വിസി നിയമനം: അന്ത്യശാസനവുമായി ഗവർണർ ആരിഫ് മുഹമ്മദ് ഖാൻ

തിരുവനന്തപുരം: കേരള സർവകലാശാല വി.സി നിയമനത്തിൽ നിലപാട് കടുപ്പിച്ച് ഗവർണർ ആരിഫ് മുഹമ്മദ് ഖാൻ. വിസിയുടെ നിയമന സമിതിയിലെ സെനറ്റ് പ്രതിനിധിയെ ഇന്ന് തന്നെ നാമനിർദ്ദേശം ചെയ്യണമെന്ന് ഗവർണർ ആവശ്യപ്പെട്ടു. കേരള സർവകലാശാല വിസിക്കാണ് ഗവർണർ അന്ത്യശാസനം നൽകിയത്. ഇന്ന് വൈകുന്നേരത്തിന് മുമ്പ് പ്രതിനിധിയെ നാമനിർദ്ദേശം ചെയ്യണമെന്നാണ് ഗവർണറുടെ ആവശ്യം. കഴിഞ്ഞയാഴ്ചയും ഗവർണർ വി.സിക്ക് സമാനമായ കത്ത് നൽകിയിരുന്നു. സെർച്ച് കമ്മിറ്റി രൂപീകരണത്തിനെതിരെ കേരള സർവകലാശാല സെനറ്റ് പാസാക്കിയ പ്രമേയം ചൂണ്ടിക്കാണിച്ചാണ് വി.സി മറുപടി നൽകിയത്. രണ്ട് പേരെ മാത്രം ഉൾപ്പെടുത്തി ഗവർണർ സെർച്ച് കമ്മിറ്റി രൂപീകരിക്കുന്നത് ശരിയല്ലെന്നും നടപടി പിൻവലിക്കണമെന്നും പ്രമേയം ചൂണ്ടിക്കാണിച്ചുകൊണ്ട് വി.സി മറുപടി നൽകി. ഇന്ന് വി.സിക്ക് അയച്ച കത്തിൽ, പ്രമേയം ശ്രദ്ധയിൽപ്പെട്ടിട്ടുണ്ടെന്നും അത് പിന്നീട് ചർച്ച ചെയ്യാമെന്നും ഗവർണർ നിർദ്ദേശിച്ചിട്ടുണ്ട്. നിലവിലെ വി.സി.യുടെ കാലാവധി അവസാനിക്കുന്ന സാഹചര്യത്തിൽ പ്രതിനിധിക്ക് ഉടനടി നിർദേശം നൽകണമെന്നും ഗവർണർ കത്തിൽ പറയുന്നു. നിലവിലെ സാഹചര്യത്തിൽ, ഈ ആവശ്യം സർവകലാശാല സെനറ്റ് അംഗീകരിക്കാൻ സാധ്യതയില്ല. അങ്ങനെ സംഭവിച്ചാൽ നിലവിലുള്ള രണ്ടംഗ സമിതിയുമായി വി.സിയെ നിയമിക്കാൻ ഗവർണർ മുന്നോട്ട് പോകുമോ എന്നതാണ് ആകാംക്ഷ. അച്ചടക്ക നടപടിയുമായി ഗവർണർ മുന്നോട്ട് പോകുമോ എന്നതും കണ്ടറിയേണ്ടതാണ്.