മിന്നൽ വരുന്നു, മുരളിയുടെ കിടിലൻ ലുക്ക് പങ്കുവെച്ച് ടൊവിനോ

അമാനുഷ സിദ്ധികളുള്ള സൂപ്പർ ഹ്യൂമൺ കഥാപാത്രത്തെ അവതരിപ്പിക്കുന്ന മിന്നൽ മുരളി എന്ന ചിത്രത്തിലെ പുതിയ ഫോട്ടോ പങ്കുവെച്ച് സിനിമയിലെ നായകൻ ടൊവിനോ തോമസ്. മിന്നൽ വരുന്നു എന്ന തലക്കെട്ടോടെയാണ് താരം ചിത്രം പങ്കുവെച്ചത്. സംവിധായകനും നിർമാതാക്കൾക്കുമൊപ്പം നാളെ ലൈവ് വരുന്നു എന്ന അറിയിപ്പും താരം നൽകിയിട്ടുണ്ട്.

ടൊവിനോയുടെ ആരാധകർ ഏറെ ആകാംക്ഷയോടെ കാത്തിരിക്കുന്ന ചിത്രമാണ് മിന്നൽ മുരളി. ബേസിൽ ജോസഫാണ് ഈ സൂപ്പർ ഹീറോ അഡ്വഞ്ചർ സിനിമയുടെ സംവിധായകൻ. വീക്കെൻഡ് ബ്ലോക്ക് ബസ്റ്റേഴ്സിൻ്റെ ബാനറിൽ സോഫിയാ പോളാണ് ചിത്രം നിർമിക്കുന്നത്. അരുൺ അനിരുദ്ധൻ, ജസ്റ്റിൻ മാത്യു എന്നിവരാണ് തിരക്കഥ രചിച്ചത്. സമീർ താഹിർ ഛായാഗ്രഹണവും ലിവിങ്ങ്സ്റ്റൺ മാത്യു എഡിറ്റിങ്ങും നിർവഹിക്കുന്നു. ഷാൻ റഹ്മാൻ, സുഷിൻ ശ്യാം എന്നിവരാണ് സംഗീതം.

തമിഴ്, തെലുഗ്, കന്നട, ഹിന്ദി ഭാഷകളിലേക്ക് സിനിമ ഡബ്ബ് ചെയ്യുന്നുണ്ട്. 2020-ൽ റിലീസ് ചെയ്യുമെന്ന് പ്രതീക്ഷിച്ചിരുന്ന സിനിമ കൊവിഡ് മൂലമാണ് ഇത്രയും നീണ്ടുപോയത്. വരുന്ന ഡിസംബർ 24-ന് നെറ്റ്ഫ്ലിക്സിൽ റിലീസ് ചെയ്യുമെന്നാണ് ഒടുവിൽ പുറത്തുവന്ന വാർത്തകൾ. തിയേറ്ററുകൾ തുറക്കുന്നതോടെ പ്രദർശന കാര്യത്തിൽ മാറ്റങ്ങൾ വരുമോ എന്നത് വ്യക്തമല്ല.