മൊബൈൽ ഇന്റർനെറ്റ് വേഗത; ഇന്ത്യ ലോകത്ത് 69-ാം സ്ഥാനത്ത്
ന്യൂഡൽഹി: ആഗോള ഇന്റർനെറ്റ് സ്പീഡ് ടെസ്റ്റിംഗ് ഏജൻസിയായ ഊക്ലയുടെ കണക്കനുസരിച്ച് മൊബൈൽ ഇന്റർനെറ്റ് വേഗതയിൽ ഇന്ത്യ 69-ാം സ്ഥാനത്ത്. ഇതാദ്യമായാണ് 100 രാജ്യങ്ങളുടെ പട്ടികയിൽ ഇന്ത്യ ഇടം നേടുന്നത്. കഴിഞ്ഞ ജനുവരിയിൽ 116-ാം സ്ഥാനത്തായിരുന്നു. തുടർച്ചയായി ഒന്നാം സ്ഥാനത്ത് യുഎഇയാണ്. ഖത്തർ, നോർവേ, ദക്ഷിണ കൊറിയ, ഡെൻമാർക്ക് എന്നിവയാണ് ആദ്യ അഞ്ച് സ്ഥാനങ്ങളിൽ. ഈ വർഷം ജനുവരിയിൽ ഇന്ത്യയിലെ ശരാശരി ഡൗൺലോഡ് വേഗത 29.85 എംബിപിഎസും ശരാശരി അപ്ലോഡ് വേഗത 6.16 എംബിപിഎസുമായിരുന്നു. ഫിക്സഡ് ബ്രോഡ്ബാൻഡ് വേഗതയുടെ കാര്യത്തിൽ ഇന്ത്യ 79 ആം സ്ഥാനത്താണ്. ഡൗൺലോഡ് ചെയ്യുന്നതിന് ശരാശരി വേഗത 50.02 എംബിപിഎസും അപ്ലോഡിന് 48.77 എംബിപിഎസുമാണ്.
