'നൈറ്റ് ഡ്രൈവ് ' ചിത്രീകരണം തുടങ്ങി; അന്ന ബെന്നിനൊപ്പം റോഷൻ മാത്യുവും ഇന്ദ്രജിത്തും

വൈശാഖ് സംവിധാനം ചെയ്യുന്ന 'നൈറ്റ് ഡ്രൈവ് ' എന്ന ചിത്രത്തിൻ്റെ ഷൂട്ടിങ്ങ് ആരംഭിച്ചു. അന്ന ബെൻ ആണ് ചിത്രത്തിലെ നായിക. റോഷൻ മാത്യു, ഇന്ദ്രജിത്ത് സുകുമാരൻ തുടങ്ങിയവരും ചിത്രത്തിലുണ്ട്.

അഭിലാഷ് പിള്ളയാണ് ചിത്രത്തിൻ്റെ തിരക്കഥ ഒരുക്കിയിരിക്കുന്നത്. രണ്ടു വർഷം മുമ്പാണ് നൈറ്റ് ഡ്രൈവിനെപ്പറ്റി തിരക്കഥാകൃത്ത് തന്നോട് സംസാരിക്കുന്നതെന്നും സിനിമ യാഥാർഥ്യമാക്കാനുള്ള ശ്രമങ്ങൾ അന്നു മുതൽ ആരംഭിച്ചതാണെന്നും സംവിധായകൻ പറഞ്ഞു. ദീർഘനാളത്തെ കാത്തിരിപ്പിനു ശേഷമാണ് ചിത്രീകരണം തുടങ്ങാൻ കഴിഞ്ഞത്. മികച്ച അഭിനേതാക്കളാണ് ചിത്രത്തിൽ ഉള്ളത്. ഷാജി കുമാർ ഛായാഗ്രഹണവും സുനിൽ എസ് പിള്ള എഡിറ്റിങ്ങും നിർവഹിക്കുന്നു. സംഗീതം രഞ്ജിൻ രാജ്.

'പോക്കിരി രാജ' എന്ന മമ്മൂട്ടി ചിത്രത്തിലൂടെ സ്വതന്ത്ര സംവിധായകനായ വൈശാഖിൻ്റെ മോഹൻലാൽ ചിത്രം 'പുലിമുരുകൻ' മലയാളത്തിലെ എക്കാലത്തേയും വലിയ ബോക്സ് ഓഫീസ് വിജയങ്ങളിൽ ഒന്നായിരുന്നു. മലയാളത്തിൽ 100 കോടി കളക്ഷൻ ക്ലബ്ബിലെത്തിയ ആദ്യ ചിത്രമായിരുന്നു പുലി മുരുകൻ. 'സീനിയേഴ്സ് ', 'മല്ലുസിങ്ങ് ', 'സൗണ്ട് തോമ', 'കസിൻസ് ', 'മധുര രാജ' എന്നിവയാണ് വൈശാഖിൻ്റെ ശ്രദ്ധേയമായ മറ്റു ചിത്രങ്ങൾ.