പ്രഭാസിന്റെ രാധേശ്യാം മാർച്ച് 11ന് തിയറ്ററിലെത്തും
ആരാധകർ കാത്തിരുന്ന പ്രഭാസ് പ്രണയനായകനാവുന്ന ചിത്രം 'രാധേശ്യാം' റിലീസ് പ്രഖ്യാപിച്ചു. ജനുവരിയിൽ ചിത്രം റിലീസ് പ്രഖ്യാപിച്ചിരുന്നെങ്കിലും കൊവിഡ് രൂക്ഷമായതോടെ റിലീസ് മാറ്റുകയായിരുന്നു. ഇപ്പോൾ ചിത്രത്തിന്റെ പുതിയ റിലീസ് തിയതി പുറത്തുവിട്ടിരിക്കുകയാണ് അണിയറ പ്രവർത്തകർ. പുതിയ പോസ്റ്ററിനൊപ്പം പ്രഭാസ് തന്നെയാണ് റിലീസ് തിയതി പ്രഖ്യാപിച്ചത്. മാർച്ച് 11നാണ് ചിത്രം റിലീസ് ചെയ്യുക.
പൂജ ഹെഗ്ഡെ നായികയാവുന്ന ചിത്രം സംവിധാനം ചെയ്യുന്നത് രാധ കൃഷ്‍ണ കുമാറാണ്. ഹസ്തരേഖ വിദഗ്ദ്ധനായ വിക്രമാദിത്യയെന്ന കഥാപാത്രമായി പ്രഭാസ് എത്തുമ്പോള്‍ പ്രേരണയായാണ് പൂജ ഹെഗ്ഡെ ചിത്രത്തില്‍ വേഷമിടുന്നത്. ഇരുവരുടെ പ്രണയമാണ് ചിത്രത്തിൽ നിറഞ്ഞു നിൽക്കുന്നത്.
യുവി ക്രിയേഷന്‍, ടി - സീരീസ് ബാനറില്‍ ഭൂഷണ്‍ കുമാര്‍, വാംസി, പ്രമോദ് എന്നിവര്‍ ചേര്‍ന്ന് ചിത്രം നിർമിക്കുന്നത്. ചിത്രത്തില്‍ സച്ചിന്‍ ഖേദേക്കര്‍, ഭാഗ്യശ്രീ, പ്രിയദര്‍ശി, മുരളി ശര്‍മ, സാശാ ചേത്രി, കുനാല്‍ റോയ് കപൂര്‍ എന്നിവരും പ്രധാന വേഷം കൈകാര്യം ചെയ്യുന്നുണ്ട്. തെലുങ്ക്, ഹിന്ദി, തമിഴ്, മലയാളം എന്നീ നാല് ഭാഷകളില്‍ പുറത്തിറങ്ങുന്ന രാധേശ്യാമിലെ മനോഹരമായ ഗാനങ്ങള്‍ ചിട്ടപ്പെടുത്തിയിരിക്കുന്നത് ജസ്റ്റിന്‍ പ്രഭാകര്‍. ഛായാഗ്രഹണം മനോജ് പരമഹംസ, എഡിറ്റിംഗ് കോട്ടഗിരി വെങ്കിടേശ്വര റാവു, ആക്ഷന്‍ നിക്ക് പവല്‍, ശബ്ദ രൂപകല്‍പ്പന റസൂല്‍ പൂക്കുട്ടി, നൃത്തം വൈഭവി, കോസ്റ്റ്യൂം ഡിസൈനര്‍ തോട്ട വിജയഭാസ്‌കര്‍, ഇഖ ലഖാനി, എക്സിക്യൂട്ടീവ് പ്രൊഡ്യൂസര്‍ എന്‍ സന്ദീപ്.
