മഴ ഇന്നും തുടരും; മത്സ്യബന്ധനത്തിന് പോയവർ മടങ്ങി എത്താൻ നിർദേശം
തിരുവനന്തപുരം: സംസ്ഥാനത്ത് മഴ ഇന്നും തുടരും. ഒറ്റപ്പെട്ട സ്ഥലങ്ങളിൽ മഴയ്ക്ക് സാധ്യതയുണ്ട്. തെക്കൻ കേരളത്തിലും മധ്യ കേരളത്തിലെ കിഴക്കൻ മേഖലകളിലും കൂടുതൽ മഴ ലഭിച്ചേക്കും. ശക്തമായ തിരമാലയ്ക്കും കാറ്റിനും സാധ്യത ഉള്ളതിനാൽ കേരളാ തീരത്ത് നിന്ന് കടലിൽ പോയവർ തിരിച്ചെത്തണമെന്നും നിർദേശമുണ്ട്. ബംഗാൾ ഉൾക്കടലിൽ നിലനിൽക്കുന്ന ന്യൂനമർദ്ദമാണ് മഴയ്ക്ക് കാരണം. ഈ തീവ്ര ന്യൂനമർദം അടുത്ത ഏതാനും മണിക്കൂറുകൾക്കുള്ളിൽ ശ്രീലങ്കൻ തീരത്ത് കരതൊടാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. പിന്നീട് ഇത് കന്യാകുമാരി കടലിലേക്ക് എത്തുമെങ്കിലും ശക്തിപ്രാപിക്കാൻ സാധ്യതയില്ല. എന്നാൽ കേരളത്തിൽ അടുത്ത ദിവസങ്ങളിലും മഴ തുടർന്നേക്കും.
