മണപ്പുറത്തിന്റെ 'സായൂജ്യം'; തിരുപഴഞ്ചേരിക്കിത് സ്വപ്നസാഫല്യം
തൃപ്രയാർ: ഇടിഞ്ഞു വീഴാറായ കൂരകളിൽ നോക്കി പരിതപിച്ച കാലങ്ങളെ വിസ്‌മൃതിയിലാഴ്ത്തി തിരുപഴഞ്ചേരി ലക്ഷം വീട് കോളനി അതിന്റെ മുഖച്ഛായ വീണ്ടെടുക്കുന്നു. മണപ്പുറം ഫൗണ്ടേഷന്റെ സ്വപ്ന പദ്ധതിയായ സായൂജ്യത്തിലൂടെ പൂർത്തീകരിച്ച പതിനാറ് സ്നേഹഭവങ്ങളുടെ താക്കോൽദാനം ജലസേചന വകുപ്പ് മന്ത്രി റോഷി അഗസ്റ്റിൻ നിർവഹിച്ചു. മണപ്പുറം ഫിനാൻസ് എം ഡി യും സി.ഇ.ഓ യുമായ വി പി നന്ദകുമാർ പദ്ധതി സമർപ്പിച്ചു. ചടങ്ങിൽ എടത്തുരുത്തി ഗവൺമെന്റ് ഐടിഐയിലേക്കുള്ള വാട്ടർ കിയോസ്‌ക്കിന്റെ സമർപ്പണം മന്ത്രി റോഷി അഗസ്റ്റിൻ പ്രിൻസിപ്പൽ ദിവ്യ കെ ക്കു കൈമാറി. തുടർന്നു വി.പി നന്ദകുമാർ അദ്ദേഹത്തിന്റെ ജന്മദിനത്തിനോടനുബന്ധിച്ചു വൃക്ഷ തൈയും നട്ടു. തിരുപഴഞ്ചേരി കോളനിയിലെ 2 കിണറുകളും, 2 കുളങ്ങളും നവീകരിക്കാനായി 5 ലക്ഷം രൂപയും ചടങ്ങിൽ പ്രഖ്യാപിച്ചു.
മണപ്പുറം ഫൗണ്ടേഷൻ മാനേജിങ് ട്രസ്റ്റീ വി പി നന്ദകുമാറിന്റെ മാതാവ് സരോജിനി പത്മനാഭന്റെ സ്മരണാർത്ഥം തുടക്കമിട്ട സായൂജ്യം പദ്ധതിയിലൂടെ നിരവധി സേവനപ്രവർത്തനങ്ങളാണ് കോളനിയിൽ പൂർത്തീകരിച്ചത്. രണ്ടു കിടപ്പുമുറി, ഹാൾ, അടുക്കള, വരാന്ത, ശുചിമുറി ഉൾപ്പടെ 450 ചതുരശ്രയടി വിസ്തീർണത്തിലാണ് ഓരോ വീടും പൂർത്തീകരിച്ചത്. നേരത്തെ കോളനിയിലേക്ക് 10 അടി വീതിയിൽ റോഡും നിർമിച്ചു നൽകിയിരുന്നു.
ജനുവരി ആറിനാണ് റവന്യൂ വകുപ്പ് മന്ത്രി കെ രാജൻ ശിലാസ്ഥാപന ചടങ്ങ് നടത്തിയത്. തൃശൂർ ബദലഹേം ഡെവലപ്പേഴ്സിന്റെ സഹകരണത്തോടെയാണ് അഞ്ചു മാസങ്ങൾ കൊണ്ട് വീടുകൾ നിർമിച്ചു നൽകുന്നത്. തളിക്കുളം ബ്ലോക്ക് പ്രസിഡണ്ട് കെ.സി പ്രസാദ് അധ്യക്ഷത വഹിച്ച ചടങ്ങിൽ മണപ്പുറം ഫൗണ്ടേഷൻ സി ഇ ഒ ജോർജ് ഡി ദാസ് പദ്ധതി വിശദീകരിച്ചു. ഇ ടീ ടൈസൺ മാസ്റ്റർ എം എൽ എ, ജില്ലാ പഞ്ചായത്ത് പ്രസിഡണ്ട് പി കെ ഡേവിസ് മാസ്റ്റർ, കളക്ടർ കൃഷണ തേജ, ആശീർവാദ് മൈക്രോ ഫിനാൻസ് എം ഡി രവീന്ദ്ര ബാബു എന്നിവർ മുഖ്യാതിഥികളായിരുന്നു.
ചടങ്ങിൽ വലപ്പാട് ഗ്രാമപഞ്ചായത്ത് പ്രസിഡണ്ട് ഷിനിത വി ഡി, തൃശ്ശൂർ ജില്ലാ പഞ്ചായത്ത് ക്ഷേമ കാര്യ സ്റ്റാന്റിംഗ് കമ്മറ്റി ചെയർമാൻ പി എം അഹമ്മദ് , തൃശ്ശൂർ ജില്ലാ പഞ്ചായത്ത് മെമ്പർ മഞ്ജുള അരുൺ , ഇടതുരത്തി ഗ്രാമപഞ്ചായത് പ്രസിഡണ്ട് സി കെ ചന്ദ്രബാബു , പെരിഞ്ഞനം ഗ്രാമപഞ്ചായത്ത് പ്രസിഡണ്ട് വിനീത മോഹൻദാസ്,മണപ്പുറം ഫൗണ്ടേഷൻ ജനറൽ മാനേജർ ജോർജ് മൊറേലി എന്നിവർ പ്രസംഗിച്ചു.
