മകനെ കാണാൻ ഷാരൂഖ് ഖാൻ ജയിലിൽ

മയക്കുമരുന്ന് കേസിൽ അറസ്റ്റിലായി മുംബൈ ആർതർ റോഡ് ജയിലിൽ കഴിയുന്ന മകൻ ആര്യൻ ഖാനെ കാണാൻ ബോളിവുഡ് താരം ഷാരൂഖ് ഖാൻ ജയിലിൽ എത്തി. ഒക്ടോബർ 3-ന് അറസ്റ്റിലായ ശേഷം ആദ്യമായാണ് മകനെ കാണാൻ ഷാരൂഖ് ജയിലിൽ വരുന്നത്. എൻഡിപിഎസ് കോടതി ജാമ്യാപേക്ഷ തള്ളിയതിനെ തുടർന്ന് ഇന്ന് മുംബൈ ഹൈക്കോടതിയെ സമീപിക്കാനാണ് ആര്യൻ ഖാൻ ഒരുങ്ങുന്നതെന്ന് റിപ്പോർട്ടുകളുണ്ട്.

താൻ മയക്കുമരുന്ന് ഉപയോഗിക്കുകയോ കൈവശം വെയ്ക്കുകയോ ചെയ്യാതിരുന്നിട്ടും കോടതി ജാമ്യം നിഷേധിക്കുന്നത് അനീതിയാണെന്ന് ചൂണ്ടിക്കാട്ടിയാണ് ആര്യൻ ഹൈക്കോടതിയിൽ ജാമ്യാപേക്ഷ നൽകുന്നത്.

മകന്റെ അറസ്റ്റിനെ കുറിച്ച് ഷാരൂഖ് ഇതുവരെ മാധ്യമങ്ങളോട് പ്രതികരിച്ചിട്ടില്ല. ആഴ്ചയിൽ ഒരിക്കൽ അനുവദിച്ചിട്ടുള്ള വീഡിയോ കോളിലൂടെയാണ് കഴിഞ്ഞ രണ്ടാഴ്ചയിൽ ഏറെയായി ഷാരൂഖ് മകനുമായി ബന്ധപ്പെടുന്നത്. തന്നെയും കുടുംബത്തെയും ആശ്വസിപ്പിക്കാൻ ബോളിവുഡിലെ സഹപ്രവർത്തകർ താരത്തിന്റെ വസതിയായ മന്നത്തിൽ നേരിട്ട് എത്തുന്നതിനെ അദ്ദേഹം തടഞ്ഞിരുന്നതായി നേരത്തേ റിപ്പോർട്ടുകൾ ഉണ്ടായിരുന്നു.