ട്വന്റി 20 ലോകകപ്പില്‍ ഇനി സൂപ്പർ 12 പോരാട്ടങ്ങള്‍
സിഡ്‌നി: ടി20 ലോകകപ്പിന്‍റെ ഗ്രൂപ്പ് ഘട്ട മത്സരങ്ങളെല്ലാം പൂർത്തിയായി. ഇതോടെ സൂപ്പർ 12 ന്‍റെ ചിത്രം തെളിഞ്ഞു. ഒക്ടോബർ 22 മുതൽ സൂപ്പർ 12 മത്സരങ്ങൾക്ക് ലോകകപ്പ് വേദിയാകും. സൂപ്പർ 12 ന്‍റെ ആദ്യ മത്സരം തുല്യ ശക്തികളുടെ പോരാട്ടമാണ്. ആതിഥേയരായ ഓസ്ട്രേലിയ കരുത്തരായ ന്യൂസിലൻഡിനെ നേരിടും. ഗ്രൂപ്പ് കടമ്പ മറികടന്ന് നാല് ടീമുകളാണ് സൂപ്പർ 12-ൽ ഇടം നേടിയത്. ഗ്രൂപ്പ് എയിൽ നിന്ന് ശ്രീലങ്കയും നെതർലൻഡ്സും ഗ്രൂപ്പ് ബിയിൽ നിന്ന് സിംബാബ്‌വെയും അയർലണ്ടും സൂപ്പർ 12 ൽ ഇടം നേടി. ഗ്രൂപ്പ് എയിൽ ശ്രീലങ്കയും ഗ്രൂപ്പ് ബിയിൽ സിംബാബ്‌വെയുമാണ് ചാമ്പ്യൻമാർ. സൂപ്പർ 12 മത്സരങ്ങൾ രണ്ട് ഗ്രൂപ്പുകളിലായാണ് നടക്കുക. പ്രാഥമിക ഘട്ടത്തിൽ ഗ്രൂപ്പ് എയിൽ ഒന്നാമതെത്തിയ ശ്രീലങ്ക സൂപ്പർ 12 ലെ ആദ്യ ഗ്രൂപ്പിലാണ്. ഗ്രൂപ്പ് ബിയിൽ രണ്ടാം സ്ഥാനത്തെത്തിയ അയർലൻഡും ആദ്യ ഗ്രൂപ്പിലാണ്. ഇതാണ് സൂപ്പർ 12 ലെ മരണഗ്രൂപ്പ്.
