സുരേഷ് ഗോപിയുടെ പാപ്പൻ സെക്കൻ്റ് ലുക്ക് പുറത്ത്
ജോഷി സംവിധാനം ചെയ്യുന്ന സുരേഷ് ഗോപി ചിത്രം പാപ്പൻ്റെ സെക്കൻ്റ് ലുക്ക് പുറത്തുവിട്ട് അണിയറ പ്രവർത്തകർ. പൊലീസ് വേഷത്തിലുള്ള സുരേഷ് ഗോപിയുടെ ചിത്രമാണ് പോസ്റ്ററിൽ ഉള്ളത്. മറ്റ് താരങ്ങൾ ആരും തന്നെ പോസ്റ്ററിൽ ഇടം പിടിച്ചിട്ടില്ല.
ക്രൈം ത്രില്ലർ ഴോണറിലുള്ള ചിത്രത്തിൽ സുരേഷ് ഗോപിക്കൊപ്പം നൈല ഉഷ, കനിഹ, നീത പിള്ള, ആശ ശരത്, വിജയ രാഘവൻ, ഷമ്മി തിലകൻ, ടിനി ടോം എന്നിവരും മുഖ്യ കഥാപാത്രങ്ങളെ അവതരിപ്പിക്കുന്നു. സുരേഷ് ഗോപിയുടെ മകൻ ഗോകുൽ സുരേഷും ചിത്രത്തിലുണ്ട്. ആദ്യമായാണ് അച്ഛനും മകനും ഒരു ചിത്രത്തിൽ ഒന്നിച്ച് അഭിനയിക്കുന്നത്. ചിത്രത്തിൽ അതിഥി താരമായി ജുവൽ മേരിയും എത്തുന്നുണ്ട്.
ക്രൈംബ്രാഞ്ചിൽ നിന്ന് സ്വമേധയാ വിരമിച്ച എസ് പി എബ്രഹാം മാത്യു എന്ന മാത്തൻ്റെ കഥയാണ് ചിത്രം പറയുന്നത്. ദീർഘകാലമായി തുമ്പ് കണ്ടെത്തിയിട്ടില്ലാത്ത ഒരു കൊലപാതകക്കേസ് അന്വേഷിക്കാനായി പൊലീസ് സേനയിൽ തിരിച്ചെടുക്കപ്പെട്ടയാളാണ് മാത്തൻ. മനസ്സില്ലാ മനസ്സോടെയാണ് അയാൾ വീണ്ടും സേനയുടെ ഭാഗമാകുന്നത്.
ആർ ജെ ഷാൻ ആണ് ചിത്രത്തിൻ്റെ രചന. അജയ് ഡേവിഡ് കാച്ചപ്പിളളി ഛായാഗ്രഹണവും ശ്യാം ശശിധരൻ എഡിറ്റിങ്ങും നിർവഹിക്കുന്നു. ജെയ്ക്സ് ബിജോയ് ആണ് സംഗീത സംവിധാനം.
