അസമയത്ത് മകളെകാണാൻ വീട്ടിൽ എത്തി ;ആണ്‍ സുഹൃത്തിനെ പെണ്‍കുട്ടിയുടെ അച്ഛന്‍ കുത്തിക്കൊന്നു
തിരുവനന്തപുരം: പേട്ട ചാലക്കുടി ലൈനിലാണ് മകളെ കാണാനെത്തിയ ആണ്‍ സുഹൃത്തിനെ പെണ്‍കുട്ടിയുടെ അച്ഛന്‍ കുത്തിക്കൊന്നത്. പേട്ട സ്വദേശി അനീഷ് ജോര്‍ജ് (19) എന്നയുവാവാണ് ഇന്ന് പുലര്‍ച്ചെ മൂന്ന് മണിയോടെ കൊല്ലപ്പെട്ടത്. കൊലപാതകത്തിന് ശേഷം പ്രതി ലാലൻ പൊലീസ് സ്റ്റേഷനിൽ കീഴടങ്ങി. മകളുടെ മുറിക്ക് സമീപത്ത് നിന്ന് ശബ്ദം കേട്ടതോടെ ലാലന്‍ ആയുധവുമായി വീട് പരിശോധിച്ചു. തുടര്‍ന്ന് മകളുടെ മുറി തുറക്കാനായി തട്ടിയെങ്കിലും തുറക്കാത്തതിനെ തുടർന്ന് വാതിൽ തല്ലി തകർത്ത് അകത്ത് കയറുകയായിരുന്നു.
മുറിക്കകത്ത് അപരിചിതനെ കണ്ടതോടെ പിടിവലി ഉണ്ടാവുകയും ഇതിനിടെ അനീഷിന് കുത്തേല്‍ക്കുകയായിരുന്നു. തുടര്‍ന്ന് ലാലന്‍ തന്നെ നടന്ന സംഭവങ്ങൾ പൊലീസ് സ്റ്റേഷനിലെത്തി അറിയിച്ചു. യുവാവിനെ കുത്തിയതായും ആശുപത്രിയില്‍ എത്തിക്കണമെന്നും ലാലന്‍ പൊലീസിനോട് പറഞ്ഞു. പൊലീസ് എത്തി യുവാവിനെ മെഡിക്കല്‍ കോളേജില്‍ എത്തിച്ചെങ്കിലും മരണം സംഭവിച്ചിരുന്നു. മൃതദേഹം തിരുവനന്തപുരം മെഡിക്കല്‍ കോളേജില്‍ സൂക്ഷിച്ചിരിക്കുകയാണ്. ബികോം ഒന്നാം വര്‍ഷ വിദ്യാര്‍ത്ഥിയാണ് കൊല്ലപ്പെട്ട അനീഷ് ജോര്‍ജ്. വ്യക്തിപരമായ പ്രശ്‍നങ്ങളാണ് കൊലപാതകത്തിന് കാരണമെന്നാണ് പ്രാഥമിക നിഗമനമെന്നും മുൻ വൈരാഗ്യം ഉണ്ടായിരുന്നോ എന്നതടക്കമുളള കാര്യങ്ങൾ പരിശോധിക്കുമെന്നും അസിസ്റ്റൻന്‍റ് കമ്മീഷണർ ഡി കെ പ്രിഥ്വിരാജ് പറഞ്ഞു.
