അണ്ടര്‍ 17 വനിത ലോകകപ്പ്; മൊറോക്കോയോട് തോൽവി വഴങ്ങി ഇന്ത്യ പുറത്ത്
ഭുവനേശ്വര്‍: അണ്ടർ 17 വനിതാ ലോകകപ്പിൽ തുടർച്ചയായ രണ്ടാം മത്സരത്തിലും ഇന്ത്യ തോൽവി വഴങ്ങി. ഗ്രൂപ്പ് എയിലെ മത്സരത്തിൽ മൊറോക്കോയാണ് ഇന്ത്യയെ പരാജയപ്പെടുത്തിയത്. എതിരില്ലാത്ത മൂന്ന് ഗോളുകൾക്കാണ് ഇന്ത്യ പരാജയപ്പെട്ടത്. മൊറോക്കോയ്ക്കായി ദോഹ എൽ മദനി, യാസ്മിൻ സൗഹിർ, ദേന്യ ചെറിഫ് എന്നിവർ ഗോൾ നേടി. കരുത്തരായ മൊറോക്കോയ്ക്കെതിരെ ഇന്ത്യ മികച്ച പ്രകടനമാണ് പുറത്തെടുത്തത്. ആദ്യപകുതിയിൽ മൊറോക്കോയെ ഗോൾ രഹിത സമനിലയിൽ തളയ്ക്കാൻ ഇന്ത്യക്ക് സാധിച്ചു. രണ്ടാം പകുതിയിൽ മൊറോക്കോ ആധിപത്യം പുലർത്തി. 51-ാം മിനിറ്റിലായിരുന്നു ആദ്യ ഗോൾ. പെനാൽറ്റിയിലൂടെയാണ് ദോഹ ഗോൾ നേടിയത്. 62-ാം മിനിറ്റിൽ യാസ്മിനും ഗോൾ നേടി. മത്സരം അവസാനിക്കാൻ നിമിഷങ്ങൾ മാത്രം ബാക്കി നിൽക്കെ ദേന്യ ചെറിഫും ഗോൾ നേടിയതോടെ ഇന്ത്യയുടെ നോക്കൗട്ട് പ്രതീക്ഷകൾ അവസാനിച്ചു.
